Lajmet Te Reja nga Sporti

Marseille kompleton transferimin e Ben Arfa


Ekipi i Lyonit, ka pohuar mbrëmë se Haten Ben Arfa që nga sezoni i ardhshëm do të jetë në radhët e ekipit ku aktivizohet edhe shqiptari Lorik Cana, Olimpique Marselle.
Pas disa javësh mosmarrëveshje me mesfushorin e ri, Lyon më në fund vendosi ta lejojë transferimi i tij. Presidenti i Lyonit në disa raste kishte mohuar se është arritur marrëveshje për largimin e mesfushorit, ndërsa Marseille, disa herë kishte pohuar se kishte nënshkruar me të.

Francezi gjatë të hënës refuzoi të paraqitet në stërvitjet e Lyonit, ndërsa mbrëmë ishte pjesë e stërvitjeve të Marseillet.

Kampioni i Francës ka vërtetuar edhe në ueb faqen e vet se Ben Arfa nuk do të jetë më pjesë e këtij ekipi, dhe se është transferuar tek Marseille, për një shumë prej 12 milionë eurosh.

Ekipi i Lyonit do të fitojë edhe një milionë euro shtesë, nëse Marseille vitin e ardhshëm siguron vend për në Ligën e Kampionëve, ndërsa do të fitojë edhe 20% të shitjes së ardhshme të Ben Arfas.

Liverpool dërgon ofertën e fundit për Barryn

Mediat angleze kanë zbuluar se ekipi i Liverpoolit mbrëmë ka dërguar ofertë të re për shërbimet e mesfushorit anglez Gareth Barry, të vlefshme 17 milionë funte (21.5 milion euro).
The Sun ka shkruar se Benitez mbrëmë ka dërguar një ofertë të re tek Aston Villa të vlefshme 19 milionë euro plus 2.5 milionë në varësi prej paraqitjeve të Barryt.

Kjo ofertë është shumë më e mirë nga ajo fillestare e cila ishte 15 milionë euro, por megjithatë ende nuk i plotëson kërkesat e Martin O’Neil, i cili ka deklaruar se çmimi i mesfushorit do të jetë 23 milionë euro.

Sipas tablloidit anglez, Benitez i ka përcjellë O’Neil se kjo është oferta përfundimtare që Liverpool planifikon ta dërgojë.

[b]Inzagi: Edicionin e ardhshëm dua kurorën e dyfishtë

Sulmuesi i Milanit, Filipo Inzagi (34-vjeç), ka folur për synimet e tij për edicionin e ri. "Synimet e klubit tonë për edicionin e ardhshëm janë të qarta. Dëshirojmë të fiutojmë trofe. Kjo skuadër ka fituar dy herë Ligën e Kampionëve dhe një titull kampioni në Serie A.


Tash do të ishte mirë që krahas titullit ta fitojmë edhe Kupën e UEFA-s", ka theksuar Inzagi, skuadra e të cilit në edicionin e ri do të merr pjesë në garat e Kupës së UEFA-s, pasi nuk arriti të zë njërin nga katër vendet e para në Serie A, i cili ia siguronte kualifikimin në Ligën e Kampionëve. "Momentalisht Interi është më i miri, por do të shohim se si do të përfundojë gjithçka. A i frikësohem ndikimit të Murinjos në Inter? Nuk mund të flas për Murinjon, ngase nuk e njoh. Mund të flas vetëm për trajnerin tim Karlo Ançeloti, i cili është një trajner dhe njeri i madh. Synim tjetër imi është edhe shënimi i 300 golave në karrierë. Më mungojnë vetëm edhe 10 gola për ta përmbushur këtë synim. Do të ishte një arritje e madhe për mua", ka nënvizuar Inzagi, i cili me 63 gola të shënuar është golashënuesi më i mirë në të gjitha aktivitetet e UEFA-s.

Lampard duket se ka nënshkruar kontratë me Interin

Futbollisti i kombëtares së Anglisë dhe anëtari i Çelzit, Frank Lampard, ka nënshkruar kontratë katërvjeçare me Interin, kurse vlera e transferimit kap shifrën 7 milion funta, ka bërë të ditur e përditshmja britanike “Mirror”, e cila thirret në burimet brenda klubit zikaltër. Nënshkrimi i kontratës ka ndodhur vetëm 24 orë pasi që Çelzi nënshkroi kontratë me portugezin, Deko, i cili arriti në Londër nga Barcelona, për 7,9 milionë funta.


Sipas “Mirror”-it, 30-vjeçari Lampard në Inter do të ketë pagë vjetore prej 6 milion euro, kurse trajneri i ri, Hose Murinjo i ka garantuar atij vendin e titullarit. Lampard që disa ditë është duke kaluar pushimet në Sicili, kurse ardhja e tij në Milano pritet të ndodh në javën e ardhshme, kur edhe do të bëhet zyrtarizimi i nënshkrimit të kontratës dhe prezantimi i lojtarit para tifozëve zikaltër.

Del Boske: Do të jetë vështirë të përsëritet suksesi i Aragonesit

Njëri nga kandidatët kryesor për të marrë drejtimin e kombëtares së Spanjës, Visente del Boske, ka pohuar se do të jetë tepër vështirë që të përsëritet suksesi i arritur nga Luis Aragones. “Ajo që ka arritur Aragonesi është sukses i madh për të gjithë trajnerët spanjollë dhe ne i jemi shumë mirënjohës për këtë arritje. Ai ka bërë një punë të përkryer.
Luisi diti të zgjedh lojtarët më të mirë dhe t’i rendisë në mënyrën e duhur në lojë. Spanja ka luajtur në mënyrë të shkëlqyeshme gjatë tërë turneut dhe ishte superiore madje edhe ndaj kampionëve të botës. Kjo është një skuadër e re, të cilën e pret një e ardhme e ndritshme”, ka pohuar Del Boske.

Dy ndeshje miqësore për nder të 4 Korrikut

Organizuar nga Federata e Volejbollit e Kosovës dhe në mbështetje të Ambasadës amerikane në Prishtinë dhe Ministrisë për Kulturë, Rini e Sport, dje në kryeqytet për nder të 4 Korrikut - Ditës së Pavarësisë së SHBA-së, u zhvilluan dy ndeshje miqësore në volejboll ndërmjet Përfaqësueses së Kosovës dhe Përfaqësueses së Shqipërisë.
Në konkurrencën e femrave, fitores iu gëzuan vashat nga Shqipëria, me rezultat 3:0, në sete 21:25, 22:25, 15:25). Ndërkohë te meshkujt pas një loje interesante dhe rivalizuese fitore shënuan volejbollistët kosovarë, me rezultat 3:2, në sete 26:24, 23:25, 25:20, 20:25, 15:11). I pranishëm në këtë ndeshje ishte edhe presidenti i Federatës botërore në beach-volley (volejboll në rërë), Zhan Pier. Ai me këtë rast bëri të ditur se Kosova është pranuar anëtare me të gjitha të drejtat në këtë asociacion ndërkombëtar, i cili funksionon që nga viti 2006 dhe në gjirin e vet ka 65 shtete anëtare.

Për herë të para Kupa e Libertadores shkoi në Ekuador

Falë ekzekutimit më të mirë të penalltive, skuadra LDU nga Kiti, është bërë klubi i parë në historinë e futbollit të Ekuadorit, i cili ka triumfuar në Kupën e Libertadores, garë kjo në Amerikën Latine, e ngjashme me Ligën e Kampionëve në Evropë.


Në ndeshjen e kthimit finale, LDU pësoi humbje në Rio de Zhanieri, nga Fluminense, me rezultat 3:1, mirëpo duke pasur parasysh se ndeshjen e parë e fitoi skuadra ekuadoriane, 4:2, u zhvillua loja shtesë. Në fakt, sipas rregullores së garave të kësaj kupe, në finale nuk vlen epërsia e golave si mysafirë. Pas lojës shtesë prej 30 minutash rezultati mbeti i pandryshuar, kështu që fituesin e përcaktuan 11-metërshat. Portieri i LDU-s, Hose Francisko Sevalos ishte heroi i fitores në serinë e penalltive, pasi mbrojti madje tri gjuajtje të futbollistëve brazilian, duke ia sjellë skuadrës së tij këtë trofe të çmuar.

Supersoniksët braktisin Sietëllin

Supersoniksët e famshëm nuk janë më banorë të Sietëllit, ngase pronari i klubit Klej Benet pas përfundimit të kontestit gjyqësor ka fituar mundësinë që ta transferojë skuadrën në vendlindjen e tij në Oklohama Siti. Benet do të jetë i obliguar t'i paguajë Sietëllit 75 milionë dollarë, kurse më pas skuadra do të shkojë në qytetin e tij të lindjes, që vitin e kaluar ishte qytet mikëpritës i skuadrës Nju Orlind Hornets, për shkak të uraganit Katrina.


Soniksët kanë pasur probleme të mëdha me palestrën "Ki Arena" në Sietëll, të cilën e paguajtën shumë shtrenjtë, prandaj krerët e klubit vendosën që të shkojnë në Oklohama Siti, ku qytetarët nëpërmjet tatimeve do të ndajnë 121 milionë dollarë për palestrën e sportit. Ende nuk dihet se çfarë emri do të bartë skuadra në edicionin e ri, megjithëse parashikohet që më të mos quhet Supersoniks. Ndërkaq drejtuesit e NBA-së presin që Sietëlli të mos mbetet pa skuadër.

Portsmouth ofron 12.5 milionë euro për Crouch

Trajneri i Portsmouth, Harry Redknapp, është i gatshëm të bëjë ofertë prej 12.5 milionë eurosh për shërbimet e sulmuesit të Liverpoolit, Peter Crouch.
Liverpool gjatë javës së kaluar refuzoi ofertën prej 9 milionë eurosh dhe paralajmëroi se vlera e Crouch është 18 milionë euro. Por, Redknap nuk pajtohet me një vlerësim të tillë, pasi që sulmuesi ka vetëm edhe 12 muaj marrëveshje me Liverpoolin.

“Harry e dëshiron Crouchin dhe kjo është e qartë. Crouch i ka të gjitha kualitetet të cilat ne i kërkojmë. Për këtë arsye nuk do të heqim dorë nga angazhimi i tij”, ka thënë drejtori sportiv i Portsmouth, Peter Storrie.

Drogba i gatshëm të kalojë në Madrid

Agjenti i Didier Drogbas, ka pohuar se nuk do të ishte befasi nëse klienti i tij këtë verë do të transferohej në Real Madrid.
Sulmuesi i Chelseat ka përsëritur vazhdimisht dëshirën e tij për t’u larguar nga Stamford Bridge, ndërsa duket se këtë verë një gjë e tillë do të realizohet.

Milan qe një kohë të gjatë është duke i kërkuar shërbimet e sulmuesit nga Bregu i Fildishtë, ndërsa fjalët e agjentit të tij i kanë komplikuar edhe më shumë gjërat.

“Pse jo? Drogba është i qetë sepse ai gjendet në një skuadër të madhe siç është Chelsea, mirëpo Real Madridi është një skuadër gjigante”, i është përgjigjur agjenti i tij, Pierre Frelot, një gazetari të gazetës, “Marca”, i cili e ka pyetur për mundësinë e kalimit të Drogbas te Mbretërit.

Geret Berrit i ndalohet hyrja në klub

Geret Berri është duke bërë përpjekje maksimale që ta realizojë transferimin e tij nga Aston Villa në Liverpul, mirëpo drejtuesit e klubit ia kanë bërë të ditur se ata e kanë fjalën e fundit për këtë çështje. Në fakt, ylli të Aston Villës i është ndaluar hyrja në stërvitje të skuadrës dhe në hapësirat e klubit, kurse njëherësh është dënuar edhe me 100.000 funta.


Kjo gjobë Berrit iu shqiptua për shkak se javën e kaluar deklaroi se trajneri i tij, Martin O'Nill "e çon kohën kot si komentator televiziv, në vend se të mendojë për të ardhmen e futbollistëve të tij". Kjo deklaratë e ka nervozuar së tepërmi O'Nillin, i cili para stërvitjes së parë për edicionin e ri ka vendosur të marrë masa drastike ndaj futbollistit. Ai në marrëveshje me drejtuesit e tjerë të klubit i ka dërguar një letër Berrit në shtëpinë e tij, në të cilën shkruante se atij i ndalohet hyrja në stërvitje dhe në objektet e klubit për një kohë të pacaktuar, si dhe dënimi në vlerë prej 100.000 funta (pagë dyjavore e futbollistit). Ndërkohë, sipas mediave angleze Liverpuli ka rritur ofertën për këtë futbollist në 15 milionë funta, kurse këto para do t'i fitojë nga shitja e Ksabi Alonsos në Juventus.

Tifozët e Milanit, kërkojnë ndërrim të Berlusconit

Tifozët e rosonerëve janë të pakënaqshëm me mënyrën se si udhëhiqet klubi i tyre dhe kanë filluar një peticion për ndryshim të pronarit aktual, Silvio Berlusconi.
Politika jo e mirë e transferimeve, e aplikuar gjatë sezoneve të fundit, i ka dëshpëruar tifozët e rosonerëve, të cilët kanë filluar peticion për ndërrimin e pronarit.s

“Klubit i mungojnë mjetet krahasuar me ekipet angleze dhe spanjolle, andaj i ftojmë tifozët të protestojnë për ndërrime për të mirën e klubit. I jemi falënderues presidentit për punën të cilën e ka bërë deri tani, por dy viteve të fundit kemi fituar sepse ekipi bënte mrekulli, dhe jo për diçka tjetër”, thuhet në publikimin e peticionit për Berlusconin.

“Duam ta bëjnë të ditur qartas se jemi të zhgënjyer me gjendjen e tanishme të klubit. Milani ka merituar respekt dhe përkushtim, për të mirën e klubit kërkojmë që presidenti ta shesë klubin, me qëllim që t’ua kthejë krenarinë tifozëve”, thuhet më tej në publikim.

Prandelli: Interi dhe Juventusi favoritë për skudeton

Trajneri i Fiorentinës, Cesare Prandelli, ka thënë se Interi dhe Juventusi do të jenë kandidatët kryesorë për titullin në Serie A, gjatë sezonit të ardhshëm.
“Favoritë për titullin e sezonit të ardhshëm do të jenë Interi dhe Juventusi. Duhet ta pranoj, jam kurioz të shoh se çfarë do të bëjë Mourinho për futbollin italian. Për bardhezinjtë mund të them se, ata janë të etshëm dhe kjo i bën ata shumë më të rrezikshëm. Juventus është shumë afër Interit”, ka thënë Prandelli në një intervistë të dhënë për sportiven Gazzetta dello Sport.

“Pas tyre është Roma dhe Milani. Ne jemi nuk jemi në garë për skudeton, por jemi në grupin i cili do të konkurrojë për vendet të cilat dërgojnë në Ligën e Kampionëve”, ka shtuar trajneri italian

Monaco ofron 7.5 milionë euro për Tiagon

Sipas mediave në Itali dhe Francë, Monaco i ka bërë ofertë prej 7.5 milionë eurosh Juventusit, me shpresë për t’i dhënë fund dështimit të portugezit Tiago Mendes në Serie A.
Tiago nënshkroi për Juventusin gjatë verës së kaluar për një shumë prej 13 milionë eurosh, sidoqoftë ai ka qenë një dështim i madh i klubit nga Torino, duke bërë vetëm 10 ndeshje si fillestar në Serie A dhe duke mos shënuar asnjë gol.

Bardhezinjtë janë përpjekur vazhdimisht ta japin si huazim 27-vjeçarin gjatë muajit janar, dhe madje të arrijnë marrëveshje me Tottenhamin, por lojtari refuzoi lëvizjen.

Sipas raporteve të fundit në Itali, ekipi francez i Monakos i ka ofruar Juventusit 7.5 milionë euro për lojtarin. Mbetet të shihet nëse Juve do ta pranojë një humbje të tillë, krahasuar me shumën që paguan gjatë verës së kaluar.

Filloi kampi i përfaqësuses së Kosovës për grupmoshat e reja

Dje në Vushtrri në mënyrë solemne u bë hapja e Kampit grumbullues të Përfaqësueseve të Kosovës në të dy konkurrencat. Pas fjalës përshëndetëse të kryetarit të FHK-së Mexhit Devaja, të pranishmit i përshëndeti edhe drejtori i QendrWs per Edukim, Zhvillim dhe Siguri në Vushtrri, Lulzim Fushtica, i cili ju dëshiroi mirëseardhje shpresave të ardhshme të sportit kosovarë, duke ofruar gjithnjë mbështetje kur është fjala për sportin dhe rininë tonë i bindur se kjo urë bashkëpunimi do të vazhdon edhe në të ardhmen.


Kampin grumbullues të Përfaqësueseve të Kosovës e shpalli të hapur Bedri Cahani, drejtori Departamentit për Sport pranë Ministrisë së Kulturës, Rinisë dhe Sportit të cilët edhe materialisht e kanë mbështetur kampin për mëse 80 pjesëmarrës dhe 15 trajnerë, të cilët gjatë 7-të ditëve sa do të zgjasë Kampi (2 - 9 Korrik 2008) do të punojnë në ngritjen, përsosjen dhe identifikimin e lojtarëve kulminant për Përfaqësuesen e Kosovës që pritet së shpejti edhe zyrtarisht të ketë paraqitje në arenën nderkombëtare (pas 26/27 Shtatorit 2008, kur është Kongresi i EHF-it). Duhet falënderuar edhe Kuvendin Komunal të Vushtrrisë gjegjësisht drejtoratin për Arsim dhe Kulturë në krye me Qerim Selimi, të cilët po mundësojnë ushtrimet në Palestrën e qyetit duke dhënë kontributin e tyre në organizimin sa më të mirë të këtij kampi.
Përveç të perzgjedhurëve të cilët i kanë ftuar përzgjedhësit Alfred Llazari dhe Ismet Jupa, Kampin me mjete vetanake janë duke e vijuar edhe disa hendbollistë dhe hendbolliste, të cilët e kanë tretmanin e njëjtë sikur edhe të përzgjedhurit.
Duhet theksuar se përveç përzgjedhësit të femrave prof Ismet Jupa me hendboliste po punojnë edhe prof Zijavere Salihu – Loshi, Lulzim Nagavci dhe Fatmire Basholli, kurse për shkaqe të ndryshme nuk ju përgjegjën ftesës prof Rifat Shabani dhe Agim Shkodra.
Kurse tek hendbollistët përveç përzgjedhësit Alfred Llazari në punë janë të kyqur edhe trajnerët: Taib Kabashi, Verim Zherka, Nexhdet Dobroshi, Benan Brahushi dhe Fatmir Muhaxheri, kurse ftesës nuk ju kanë përgjegjur pozitivisht Nevzat Kastrati dhe Veton Hajrizi.
Drejtor i Kampit është Xhevdet Abazi, i cili do të koordinon punën në mes të seleksioneve, FHK-së Qendrës për Edukim, Zhvillim dhe Siguri ne Vushtrri dhe Palestrës së qytetit, ndërsa për përgatitjet, veshmbathjet dhe rekuizitat po kujdeset Xhelal Vitaku.

Pjesëmarrësit:

FEMRAT

Junioret
Florentina Kajtazi - Istogu
Fitore Berisha – Prishtina
Burneta Rama – Shqiponja
Donjeta Juniku – Shqiponja
Edona Rogova - Shqiponja
Shpresa Fazlia – Shqiponja
Albana Haliti – Kastrioti
Yllka Kupina – Kastrioti
Ditmire Basholli – Vicianet
Besa Basholli – Vicianet
Kaltrina Beka - Kosova
Vjollca Popova – Kosova
Jeta Ademi – KEK-u
Bjondina Sylejmani - Drita
Akile Kastrati

Kadetet
Edina Beqiri – Trepça
Njomza Kelmendi –Trepça
Marigona Smajli - Trepça
Burbuqe Sllakovci – Drita
Genta Orana – Drita
Ronita Halimi
Florina Ymeri - Drita
Edona Jonuzi – Kastrioti
Donika Syla – Kastrioti
Gresa Basholli – Vicianet
Rilinda Mulaku – Vicianet
Fatjona Zaberxha – Vicianet
Edona Ermeni – SHH Bashkim Idizi
Nartilla Kusari – SHH Bashkim Idrizi
Anduena Nagavci – SH Bashkim Idrizi


MESHKUJT

Juniorët

Shkumbin Shoshi – Besa Famiglia
Kastriot Shala – Besa Famiglia
Alban Kastrati – Besa Famiglia
Endrit Peja – Vëllaznimi
Besmir Kusari – Vëllaznimi
Astrit Shala – Trepça
Enis Presheva – Trepça
Shkelzen Rama – Trepça
Enis Kabashi – Trepça
Petrit Prekazi – Trepça
Lorik Ramadani – Kastrioti
Jeton Bislimi – Kastrioti
Korab Syla – Kastrioti
Ylber Mjeku – Prishtina
Driton Demiri – Prishtina
Fitim Mustafa – Prishtina
Riad Shabanaj – Kosova
Dardan Shala – Liridoni
Granit Rexhahmetaj - Liridoni


Kadetët

Jahja Mziu – Trepça
Kreshnik Krasniqi – Prishtina
Veton Gashi – Prishtina
Butrint Hasi – Vëllaznimi
Zekirja Mikullovci – Kosova
Lorik Haxhaj – Kosova
Berat Neziri – Kosova
Fatlum Ademi – Kastrioti
Vlerson Zherka – Kastrioti
Hamdi Salihu – Kastrioti
Ender Dindari – Drita
Arber Berisha – Drita
Florin Hoxha – Drita
Çlirim Bunjaku – Drita
Arbnor Muça – Besa Famiglia
Rilind Gerqari – Bashkim Idrizi
Elmir Kasumaj - Bashkim Idrizi
Vatan Beqrama – Bashkim Idrizi

Arshavin te Çelzi për 12 milionë funta

Skuadra ruse, Zenit nga Sent Peterburgu ka pranuar ofertën prej 12 milionë funtash të pronarit të Çelzit, Roman Abramoviç, për sulmuesin Andri Arshavin. Pritet që sot futbollisti rus të udhëtojë në Londër, për të biseduar rreth kushteve të kontratës me klubin londinez. "Menjëherë pasi Çelzi ka dërguar ofertën, Roman Abramoviç ka interevenuar personalisht tek drejtuesit e Zenitit dhe marrëveshja është arritur.


Arshavini menjëherë do të udhëtojë në Londër, për të finalizuar gjithçka me Çelzin", kanë cituar mediat britanike një burim nga klubi i Zenitit. "Arshavinin e ka tërhequr shumë futbolli spanjoll dhe ai është një tifoz i Barcelonës, por duket se stili i lojës në Angli i përshtatet më shumë. Pasi që në bisedime hyri edhe Roman Abramoviç, gjithçka ishte më e lehtë që ky transferim të realizohet", ka vazhduar burimi i mediave britanike brenda klubit rus.

Aragones, dy vitet e ardhshme në drejtim të Fenerbahçes

Në kolumnen e tij në të përditshmen sportive spanjolle "Marca", përzgjedhësi i Spanjës, Luis Aragones ka konfirmuar se në dy vitet e ardhshme do të punojë në klubin turk, Fenerbahçe. "Këto ditë do të udhëtojë në Stamboll, në mënyrë që të merremi vesh për detajet e mbetura të kontratës. Marrëveshja paraprake është arritur, tash kanë mbetur vetëm disa detaje të vogla. Në dy vitet e ardhshme do ta drejtojë Fenerbahçen, për një shifër prej 3 milion euro", ka theksuar Aragones.


Ndonëse është 70-vjeç dhe me me profesionin e trajnerit merret që nga viti 1974, kjo do të jetë hera e parë që Aragones do të drejtojë një skuadër jashtë kufijve të Spanjës. Ai deri më tash ka drejtuar Atletiko Madridin, Betisin, Barcelonën, Espanjollin, Sevilën, Valencinë, Oviedon, Majorkën dhe së fundmi kombëtaren e Spanjës, me të cilën arriti të fitojë titullin e kampionit evropian. Para ndeshjes finale kundër Gjermanisë, Aragones kishte demantuar marrëveshjen me Fenerbahçen, por megjithatë në fund shkrimet e mediave dolën të ishin të sakta. Ai në postin e trajnerit te Fenerbahçe do ta zëvendësojë brazilianin Ziko.