App Store mbledh 30 milionë dollarë

Vetëm një muaj pasi që është paraqitur, App Store, dyqani online i softuerëve për iPhone, ka arritur aq shumë sukses sa që për të ka mbetur pa fjalë edhe njeriu i parë i kompanisë, Steve Jobs.

Në një intervistë për gazetën prestigjioze amerikane Wall Street Journal, Jobs ka shprehur befasinë e tij me suksesin e dyqanit online App Store.

“Në karrierën e time shumëvjeçare nuk kam parë se diçka e lidhur me softuer për një kohë kaq të shkurtër të mund të korr aq shumë sukses”, ka deklaruar Jobs, duke mos fshehur kënaqësinë me rritjen e xhirollogarisë bankare të kompanisë së tij.

Në fakt, që kur është paraqitur App Store më 10 korrik, shfrytëzuesit kanë shkarkuar rreth 60 milionë programe të ndryshme, derisa në ofertë aktualisht gjenden rreth 1.000 sosh, që ka rezultuar me qarkullim prej rreth 30 milionë dollarësh amerikanë.

Natyrisht, nuk shkojnë të gjitha paratë në arkën e kompanisë Apple, duke marrë parasysh që aplikacionet në dispozicion i kanë zhvilluar programuesit e pavarur të cilët edhe kanë vendosur t’i shesin në këtë mënyrë. Apple dhe programuesit ndajnë fitimin ashtu që 30 për qind i shkojnë kompanisë Apple, derisa 70 për qind programuesve që kanë punuar aplikacionet.


www.apple.com