Toyota IQ si hibridi më i vogël?

Automjeti më i vogël me katër ulëse në botë, Toyota IQ, modeli serik i të cilit është paralajmëruar për panairin e automjeteve të Parisit në muajin tetor, njëkohësisht do të mund të bëhej edhe automjeti më i vogël hibrid në botë.

Sikur që motori bazik njëlitërsh nuk është sa duhet ekonomik, në Toyota gjoja kanë vendosur që IQ-në ta pajisin edhe me një sistem edhe më kursimtar dhe më të efektshëm duke u bazuar në gjeneratën e re të modelit Prius.

Automjetin e Toyotas në modelin hibrid do ta pajiste motori më i vogël me benzinë prej 500 kubikësh i çiftëzuar me një elektromotor të vogël dhe paketën e baterisë, e përveç energjisë së frenimit dhe punës së motorit me benzinë, bateritë do të mund të mbusheshin dhe me anë të një spine klasike prej 220 voltësh.



IQ hibrid do të mund të kishte autonominë prej 20 kilometrash ekskluzivisht me motorin elektrik, që është mjaftueshme për rrugë të shkurtra të qytetit. Supozohet se automjeti do të mund të paraqitej në shitje deri në vitin 2010.