Iron Maiden gjallëron Moskën

Legjendarët e muzikës rok "Iron Maiden" e kanë përfunduar në mënyrë shumë të suksesshëm turneun e tyre botëror me një koncert në kompleksin olimpik të Moskës.

Kjo është paraqitja e parë e bendit heavy-metal pas 15 vitesh në Moskë. Mendohej se koncerti do të dështonte pasi që muzika e tyre dhe vetë anëtarët e grupit janë ‘moshuar’ paksa, mirëpo gjithçka ndryshoi pas fillimit të këngës së parë, “Aces High”, kur të gjithë të pranishmit këndonin bashkë me frontmenin e grupit, Bruce Dickinson.

Në koncertin moskovit të grupit, i cili ka shitur mbi 80 milionë albume dhe i cili konsiderohet si njëri nga grupet më ndikues të zhanrit ‘metal’, nuk munguan hitet e përjetshme: "The Number Of the Beast", "Run To the Hills", "Fear Of the Dark" etj.