Kërkues i cili vlerëson se është më i mirë se Google

Për miliona internetomanë në mbarë botën Google është kërkuesi më kualitativ aktual i përmbajtjeve të internetit. Megjithatë, disa nuk pajtohen me këtë pohim, e njëra prej ish të punësuarave të gjigantit të internetit, e cila përfaqëson Cuil, thotë se ka kërkues “më të madh, më të shpejtë dhe më të mirë sesa Google i gjithanshëm”.Është paraqitur edhe një kërkues i hapësirës së internetit. Cuil, emërtimi i së cilit sipas pohimeve të themeluese lexohet si 'kull' (anglisht. cool), është produkt i çiftit bashkëshortor Tom Costell, profesor në Universitetin e Stanford, dhe Anne Patterson, një ish e punësuar nga Google. Patterson është larguar nga Google qysh prej vitit 2006, dhe atë me qëllim që të paraqes një kërkues të internetit i cili është më i mirë se ai nga Google.

Dallimi themelor në mes të Cuil dhe Google është në mënyrën e radhitjes së faqeve të internetit. Derisa Google mbështetet në Pagerank-un e vet, sistemi i cili analizon lidhjet deri në një hapësirë të caktuar të uebit, Cuil analizon përmbajtjen e hapësirave të veçanta të uebit dhe i radhit ato pikërisht sipas këtij parametri.

Risi e re në kërkimin e përmbajtjeve të internetit të cilat i paraqet Cuil mbështetet në kategorizimin e rezultateve të paraqitura për pyetjet e veçanta të përdoruesit. Në rast se shkruani pyetjen e kërkuar, për shembull, 'google', Cuil do t’i kategorizojë rezultatet në “tab-a” që lidhen me Google Earth, Google Search, Google Groups e të tjera.

Në të njëjtën kohë, për dallim nga Google, i cili i mban mend të gjitha pyetjet e përdoruesve ‘për të përmirësuar’ rezultatet e veta të kërkimit, në taborin e Cuil-it këtë e vlerësojnë si shkelje të intimitetit të përdorueseve dhe makina e tyre e kërkimit nuk e bën këtë. Të mos e zgjasim shumë, provoni vet ‘vrasësen’ e Googlet të plotfuqishëm në www.cuil.com.