Klubi Futbollistik "LEPENCI"

Te gjitha komentet dhe informacionet qe i keni per Klubin Futbollistik "LEPENCI" lerni ketu.

Kaçanik:Lepenci-Llapi 5:1(4:1)

Lepenci shumë i fortë për Llapin

Shënues:Nexhat Avdiu 31,Mensur Rudi 38,Skender Gashi 44 dhe 45,Nimetullah Luri 83 për Lepencin,kurse Zahir Zvishta 30 për Llapin.
Analiza
Lepenci në ndeshjen e radhës në stadiumin "Besnik Begunca" në Kaçanik ka deklasuar Llapin me rezultat të thellë 5:1.Fituesi mund të thuhet se u përcaktua qysh në pjesën e parë, kur Lepenci shënoi plotë katër herë.Terreni jo edhe aq i përshtatshëm për lojë, për shkak të shiut që ka rënë këtyre ditëve, vështirësoi paksa ritmin e lojës.Megjithatë, 2500 shikuesit e mbledhur patën rastin të shohin një ndeshje të kënaqshme me gjashtë gola.
Raporti
Skuadra e Lepencit dëshmoi edhe njëherë se e ka të vështirë të mposhtet në Kaçanik.Viktimë e radhës ishte Llapi i Podujevës që pësoi tmerrë të vërtetë duke u mposhtur me rezultat 5:1. Llapjanët kaluan të parët në epërsi nëpërmjet Zahir Zvishtës në minutën 30, pas një gabimi të portierit vendas. Mirëpo ky gëzim nuk zgjati më shumë se një minutë pasiqë Nexhat Avdiu u kundërpërgjigj për të kthyer gjithçka nga fillimi. Shtatë minuta më vonë Mensur Rudi ka goditur nga një distancë e largët, ndërsa njëri prej lojtarëve mysafir ka devijuar topin për të përfunduar në rrjetën llapjane për epërsinë e parë të Lepencit. Minutat e fundit të pjesës së parë ishin fatale për Llapin, kurse fatlume për Skender Gashin. Fillimisht në minutën 44 ai ka shënuar një gol spektakular, ndërsa menjëherë në sulmin tjetër shënoi gol edhe më të bukur, kur nga një pozitë e vështirë arriti të parabollojë portierin mysafir.Kështu Lepenci në pjesën e parë siguroi kapital prej tre golash epërsi, për t'i hyrë pjesës së dytë më me qetësi.
Në pjesën e dytë u zhvillua një lojë paksa monotone, për shkak të rezultatit.Ndërsa, mysafirët nga Llapi si duket ishin dorëzuar herët dhe nuk kishin motiv për pjesën e mbetur të lojës.Gati gjithë pjesa e dytë u zhvillua në mesin e fushës dhe pa kurrfarë koncepti, duke mos mohuar edhe ndonjë sulm të organizuar të Lepencit. Pikërisht në njërin prej këtyre sulmeve të rralla, u arritë edhe goli i pestë i Lepencit. Në fakt Nimetullah Luri e nisi vetë një sulm duke kaluar disa mbrojtës të skuadrës llapjane për të vënë në fund topin edhe në rrjetën e poriterit mysafir.Kjo ngjau në minutën e 83-të dhe ishte e tëra sa i përket kësaj ndeshjeje.
Stadiumi "Besnik Begunca" në Kaçanik.Shikues:2.500.Gjyqtarë:Ardit Kastrati,Kemajl Bunjaku dhe Shaip Thaçi.Vëzhgues: Ahmet Turku nga Mitrovica.Karton i verdhë:Fitim Hoxha i Llapit.

LEPENCI:Axahmi,Zeneli,Dema(Kuka),Musliovski(Berisha),Troni,A.Zeneli,Gashi,Luri,Avdiu,Rudi,Fera(A.Troni).Trajner: Sylejman Rexha

LLAPI:Rexhepi,Musliu,Hoxha(Zeka),Shabani(Podvorica),Hamidi,Avdyli,Mehemti,Emini,Leci,Sheholli,Zvishta(Sopjani).Trajner:Besim Ajvazi

Materiali eshte marre nga korespodenti i Kosova Sport, Shkëlqim AJDINI


--------------------------------------------------------------------------------

Kaçanik: Lepenci-Ferronikeli 5:3 (3:2)

Festival golash në Kaçanik

Shënues: Përparim Livoreka '8 dhe '40, Skender Gashi '29 , Nexhat Avdiu '47 dhe '80 për Lepencin , kurse Alban

Hajdari '42 dhe '45 , Shkelzen Nebiu '82 për Ferronikelin

Shkëlqim AJDINI

Analiza

Lepenci vazhdon serinë e fitoreve në stadiumin "Besnik Begunca". Pas zhgënjimit në Mitrovicë në përballje me Trepçën , kaçanikasit rikthyen vetëbesimin duke mposhtur Ferronikelin e Drenasit me rezultat 5:3. Edhe në këtë takim ra në sy prania e një numri të madh të shikuesve , të cilët po shtohen në çdo ndeshje. Për të përcjellur sfidën e radhës kundër Ferronikelit ishin mbledhur rreth 3500 shikues. Natyrisht se në mesin e këtyre shikuesve ishin edhe ata më të zhurmshmit , tashmë të njohurit "Fikshat" , të cilët janë krah i fortë i Lepencit.

Raporti

Takimit të radhës kundër Ferronikelit nga Drenasi , lojtarët e Lepencit i hynë me të vetmin synim , rrëmbimin e tri pikëve. Ky synim në fund edhe u arrit. Që në minutën e tetë Përparim Livoreka shënoi për të sjellur në epërsi Lepencin në 1:0. Skender Gashi as në këtë takim nuk mbeti pa shënuar. Ai në minutën 29 shfrytëzoi një huti të mbrojtjes mysafire duke ngritur rezultatin në 2:0. Përveç që njihet si realizator i spikatur , Skender Gashi kontribuoi edhe me krosime të sakta në këtë takim. Pikërisht nga një krosim i tij Përparim Livoreka shënoi golin e tij të dytë dhë të tretin për Lepencin në minutën 40. Kur të gjithë pritën përfundimin e pjesës së parë me këtë epërsi , në skenë doli Alban Hajdari i Ferronikelit , i cili shënoi dy herë për të bërë takimin më interesant.Në të dy rastet e treguara përfitoi nga gjatësia e tij duke shënuar të dy golat me kokë.

Dy minuta pas fillimit të pjesës së dytë sulmuesi i Lepencit Nexhat Avdiu shtoi epërsinë në 4:2.Në vazhdim të dy skuadrat aplikuan një lojë të hapur duke krijuar shumë raste për shënim.Në vazhdën e këtyre rasteve Nexhat Avdiu shënon sërish për të ngritur rezultatin në 5:2,kjo ndodhi në minutën e 80-të.Mirëpo,vetëm dy minuta më vonë mysafirët nga Drenasi reaguan duke zvogëluar epërsinë në 5:3, çka ishte edhe rezultat përfundimtari kësaj përballjeje. Sikur të ishin më syhapur sulmuesit e Lepencit rezultati do të ishte shumë më i lartë.Nga ana tjetër edhe lojtarët e Ferronikelit patën rastet e tyre të volitshme, por u vërejt një disponim i theksuar tek portieri vendas.Në përgjithësi shikuesit patën rastin të përcjellin një shfaqje të mirë futbollistike me gjithsej tetë gola të shënuar.

Stadiumi:"Besnik Begunca" në Kaçanik. Shikues:3500. Gjyqtarë:Shaip Grainca, Fatmir Agerbashi dhe Latif Zeneli. Vëzhgues: Beqir Hoxha nga Fushë Kosova. Karton i verdhë:Agron Zeneli i Lepencit.

LEPENCI:Axhami,Zaneli,A.Zeneli(Dema),Musliovski,Troni,Alievski,Gashi,Luri(Berisha),Avdiu,Rudi(Kuka),Livoreka.Trajner:Sylejman Rexha.

FERRONIKELI:Hajdari,Dervishiu(Avdyli),Krasniqi(Gllareva),Demaku,Mehmeti,Hajdari,Tanushi,Elshani,Hasi,Bytyqi(Istogu),Nebiu.Trajner:Mejdi Bucolli

Ndersa javen e kaluar Lepenci ne Mitrovice pesoi humbje nga Trepqa me rezultat 3:0




--------------------------------------------------------------------------------

Kaçanik 04.09.2005: Lepenci-Hasi 4:0 ( 1:0 )

Fitore bindëse për fillim të mbarë Shënues : Elmaz Musliovski '12, Skender Gashi '48 dhe '85 dhe Nexhat Avdiu '65

Analiza Lepenci i Kaçanikut filloi stinorin e ri të Ligës së Parë të Kosovës si vendës në mënyrën më të mirë. Në një terren mjaft të përshtatshëm për lojë dhe para një numri të madh shikuesish , rreth 3000 sosh , kaçanikasit mposhtën Hasin nga Rogova me rezultat të thellë 4 me 0. Gjatë gjithë rrjedhës së takimit grupi i tifozëve " Fikshat" nuk u ndalën së përkrahuri lojtarët e ekipit të tyre në fushë , të cilët dhanë maksimumin për të nisur mbarë këtë kampionat.

Raporti Ndeshja e parë e Lepencit në stadiumin " Besnik Begunca " mund të merret si sinjal për ekipet tjera se Lepenci sivjet është kandidat serioz për inkuadrim në elitën e futbollit kosovar.Katër gola të shënuar ndaj Hasit janë motivacion për djelmoshat kaçanikas që edhe në takimet e radhës të përsërisin të njëjtin sukses. Minuta e 12-të solli gëzimin e parë ndër lojtarët e Lepencit dhe te shikuesit e pranishëm. Në fakt në këtë minutë një lojtar i ekipit mysafir preku topin me dorë brenda zonës së rreptësisë dhe gjyqtari pa u hamendur tregoi në pikën e bardhë. Përgjegjësinë për ekzekutimin e dënimit më të rendë e mori Elmaz Musliovski , i cili u tregua i saktë, duke shënuar epërsinë fillestare 1:0.Në vazhdim të dyja ekipet patën disa raste , por jo për t'u veçuar ndonjëri prej tyre. Me këtë rezultat skuadrat shkuan në pushimin pesëmbëdhjetë minutësh. Pjesa e dytë solli edhe tre gola të tjerë të shënuar nga lojtarët e Lepencit. I pari "qetësinë" në pjesën e dytë e prishi sulmuesi Skender Gashi i cili nuk e pati të vështirë të shënoj kur gjendej vetëm 2 metra larg portës kundërshtare.Epërsinë në 3:0 e ngriti Nexhat Avdiu me një gjuajtje precize nga 20 metra. Përsëri në skenë doli sulmuesi Skender Gashi për të përmbyllur të tërën sa i përket kësaj ndeshje.Ai shënoi golin e dytë të tij dhe të katërtin për Lepencin pesë minuta para fishkëllimës së fundit të gjyqtarit.Do theksuar se , Lepenci huqi edhe disa raste të mira për të ngritur edhe më rezultatin. Ndërsa , lojëtarët e Hasit në pjesën e dytë nuk treguan asgjë.

Stadiumi " Besnik Begunca" në Kaçanik. Shikues : 3000.Gjyqtarë : Musa Gashi, Latif Zeneli dhe Shaip Thaçi. Vëzhgues : Enver Qosa nga Podujeva.

LEPENCI: Axhami,M.Zeneli,A.Zeneli,Musliovski(Am.Troni),Dema(A.Troni),Alievski,Gashi,Luri,Avdiu(Berisha),Rudi,Livoreka. Trajner :Sylejman Rexha.

HASI:Markaj,Gashi(Berisha),Bajraktari,Seferaj,Kryeziu,Gojani,(M.Kryeziu),A.Kryeziu(S.Gashi),Fazlija,Buqaj,Nuza,Likaj. Trajner: Faim Berisha.

Materiali i marrur nga korespodenti i Kosova Sportit Shkëlqim AJDINI

PIONIERET E RINJË PRAN KF.” LEPENCI “ VIZITUAN KAMPIN AMERIKAN "BONDSTILL"

Pionierët e rinjë pran KF.” Lepenci “ të udhëhequr nga trajneri Fatos Vishi më 29.08.2005 vizituan kampin amerikan “Bondstill”.

Në këtë vizitë pionierët patën mundësi të vizitojnë vendet më interesante të kampit.

Gjatë asaj vizitë gjithashtu u zhvillua edhe një ndeshje futbollistike e përzier ndërmjet fëmijëve dhe ushtarëve amerikan.Në fund fëmijëve iu dhuruan nga një medalje.

Kjo vizitë u mundësua nga SGT Tim Gagnon , Kacanik LMT, ndersa transporti u sigurua nga Kuvendi Komunal në Kaçanik .


--------------------------------------------------------------------------------

Kaçanik 15/08/2005

U ZGJODH KRYESIA E KF "LEPENCI'' DHE E SHTABIT TEKNIK
Në mbledhjen e vet të mbajtur më 15.08.2005, Bordi i KF"Lepenci"zgjodhi organet e KF"Lepenci".Përbërja e së cilës është siq vijon:

1. Tahir Çaka - kryetar
2. Berajdin Shehu-drejtor
3. Shemsedin Abazi-sekretar
4. Adil Brruti-arkatar
5. Nazif Reka-zëdhënës
6. Kemajl Gula-anëtar
7. Nasurulla Shehu-anëtar
8. Naser Kuka-anëtar
9. Shaban Topojani-anëtar
10. Hebib Livoreka-anëtar
11. Remzi Hoxha-anëtar

Po kjo kryesi emëroi edhe shefin e shtabit teknik të KF"Lepenci" për këtë post u emërua Sylejman Rexha.
Nga Kryesia e KF"Lepenci"



--------------------------------------------------------------------------------

Pionierët e Rinjë gjenerata 1991/1992 pran KF." Lepenci " pjesmarrës të Turneut Ndërkombëtar " Dritarja e Shpresës " mbajtur në Strugë dhe Ohër të Maqedonisë

Më 06.07.2005 në adresë të KF. " Lepenci " erdhi ftesa per pjesmarrjen e Fatosave gjenerata 1991/1992 në Turneun Ndërkombëtar në Futboll " Dritarja e Shpreses - Kupa 2005" e cila mbahet ne Strugë dhe Ohër të Maqedonisë nga data 15.- 21.07.2005. KF. " Lepenci " në këtë Turne udhetoi me 20 femije : Trimor Hoxha , Trimor Tafili, Genc Hoxha, Fitim Elezi, Hekuran Çaka, Flamur Krasniqi, Rinor Raka, Durim Tafili, Rinor Zeneli, Adrian Bajrami, Shkumbin Vishi, Taulant Bajra, Dardan Nikoci, Gojart Axhami, Shkelzen Vishi, Eroll Bislimi, Riza Bushi, Burhan Dema, Taulant Krivenjeva, Kushtrim Raka të udhëhequr nga trajneri Fatos Vishi . Në këtë Turne morën pjesë 32 ekipe nga Maqedonia, Shqiperia dhe KF."Lepenci" si ekip i vetem i cili përfaqësoi Kosovën. Shorti deshi ashtu që Lepenci të garojë në një grup me Apolonin e Fierit, Përparimin nga Ladorishta e Strugës dhe Liria nga Struga. Ndeshjen e parë Lepenci e fitoi me rezultat 1:0 ndaj Lirisë nga Struga, si dhe ndeshjen e dytë 2:0 ndaj Apollonis së Fierit, kështu që me këto dy fitore siguroi pjesmarrjen e mëtejshme në gara duke u radhitur në mesin e 16 ekipeve më të mira. Ndeshja e radhës eliminatore e zhvillua në stadiumin e Vëllazërimit të Strugës kundër ekipit të Vëllazërimit nga Struga ku pësuam disfatë 3:0. Në fund të ndarjes së shpërblimeve për më të mirët , organizatori ekipin më Fair - Play vendosi të shpallë ekipin tonë " Lepenci". Edhe vitin e kaluar Pionierët e rinjë pran " KF. Lepenci " ishin pjesëmarrës në këtë Turne ku u radhitën deri në finale , duke zënë vendin e dytë.

Pjesëmarrjen e fatosave në këtë Turne e mundësuan vetë prindërit e fëmijëve , Kuvendi Komunal në Kaçanik ,ndërsa rekuizitat u siguruan nga donatorët : NEW Lepenci , Kasabank , Silcapor , Sharr- Salloniti Sharrcem ,Kafiteria " Rrapi " .

Këshilltari për Rini e Sport dhe Trajner i Pionierëve të Rinjë Fatos Vishi


--------------------------------------------------------------------------------



Kaçanik 10 GUSHT 2005

U MBAJT TURNEU NË FUTBOLL TË VOGËL PËR NDER TË 10 GUSHTIT - DITËS SË DËSHMORËVE DHE DITËS SË KAZERMËS SË BRIGADËS 362 " AGIM BAJRAMI " TË TMK-së

Për nder të 10 Gushtit - Ditës së dëshmorëve në Komunën e Kaçanikut dhe Ditës së Kazermës së Brigadës 362 " Agim Bajrami " të TMK-së, Drejtoria për Kulturë, Rini e Sport organizoi Turne në Futboll të Vogël . Ky Turne u organizua me të gjitha ekipet fituese të Turneve Memoriale në komunën tonë, ku morë pjesë : 1. Ekipi Futbollistik " Elezajt " 2. Ekipi Futbollistik " Laxha e Re " 3. Ekipi Futbollistik " Buna " 4. Ekipi Futbolistik " Lirishta " 5. Ekipi futbollistik " Veteranët e UÇK- së " 6. Ekipi futbollistik " TMK " 7. Ekipi Futbollistik " Fikshat " 8. Ekipi Futbollistik " Bardhi " 9. Ekipi Futbollistik " Flaka " 10. Ekipi Futbollistik " Agim Bajrami " 11. Ekipi Futbollistik " Vëllezërit Çaka "

Në finale të Turneut e cila u zhvillua më 09.08.2005 në ora 18:30 në oborrin e Shkollës Fillore " Emin Duraku " u takuan ekipi Futbollistik " Vëllezërit Çaka " nga Bobi dhe Ekipi Futbollistik " Agim Bajrami " nga Stagova. Pas një ndeshje mjaft interesante fitore shënoi ekipi " Vëllezërit Çaka " me golin e vetëm të cilin e shënoi Skender Gashi në minutën e 30 .

Vendin e tretë në këtë Turne e zuri Ekipit Futbollistik " Flaka ".

Lojtari më i mirë i Turneut ishte Mentor Jaha

Portieri më i mirë i Turneut ishte Jetmir Sopa

Ndeshja finale u gjykua nga referi kaçanikas Haziz Tafili , ndërsa ndeshjet tjera u gjykuan edhe nga Jeton Matluma dhe Agim Kuka.

Në fund për tri vendet e para u ndanë disa shpërblime modeste .

Vendit të tretë Ekipit Futbollistik " Flaka " kupën ia dorzoi veterani i sportit kaçanikas Kjani Shehu.

Vendit të dytë Ekipit Futbollistik " Agim Bajrami " kupën dhe shpërblimet ia dorzoi nënkryetari i Kuvendit Komunal z . Mallzum Qajani.

Vendit të pare Ekipit Futbollistik " Vëllezërit Çaka " kupën dhe shpërblimet ia dorzoi miku nga gjermania Karl Hainz Matt, i cili ndihmoi këtë turne dhe sportin kaçanikas në përgjithsi .

Këshilltari për Rini e Sport Fatos Vishi


--------------------------------------------------------------------------------



Kaçanik,11.06.2005

FERRONIKLI-LEPENCI 4:3

Kete jave futbolistet e KF." Lepenci " pesuan disfate nga Ferronikli i Drenasit me rezultat 4:3. Javen tjeter Lepenci Zhvillon ndeshjen me KF." Deqani " ne Deqan.

Kaçanik: Lepenci-Rahoveci 6:0 (5:0)

Lepenci-Rahoveci 1:0 në sete. Shënues: Skender Gashi 13,31, Përparim Livoreka 28,44, Nexhat Avdiu 37,Musli Zeneli 80

Analiza Në ndeshjen e fundit në stadiumin "Besnik Begunca" në Kaçanik për këtë stinor, lojtarët e Lepencit shënuan fitore të lartë 6:0 në ballafaqim me Rahovecin.Për të parë këtë ndeshje ishin mbledhur rreth 2500 shikues , numër rekord për një ndeshje në Ligën e Parë të Kosovës. Ajo që e dallon këtë spektakël të organizuar në Kaçanik ishte prania e Fikshave , të cilët i kishin munguar një kohë të gjatë Lepencit.Ata me të vërtetë në këtë përballje ishin lojtari i dymbëdhjetë , duke përkrahur parreshtur lojtarët në fushë. Kjo edhe iu shpërblye nga ana e lojtarëve të Lepnecit , të cilët luajtën " tenis" me Rahovecin.Për këta të fundit si duket Lepenci ndikoi më shumë se rakia e tyre e njohur. Ata nuk ishin kërka në këtë ndeshje!

Raporti Skuadra e Lepencit ishte përgatitur maksimalisht për ndeshjen me Rahovecin , duke e pasur parasysh se kjo ishte ndeshja e fundit në Kaçanik dhe kishte domethënie të madhe në luftë për të mbetur në ligë. Në anën tjetër për Rahovecin nuk kemi çka të flasim, sepse ata si duket kishin ardhur vetëm për "adet" në Kaçanik.Serinë e golave për kaçanikasit e hapi sulmuesi i spikatur i Lepencit Skender Gashi, në minutën 13, duke paraboluar portierin mysafir , i cili kishte boshatisur portën e tij. Në 2:0 epërsinë e ngriti Përparim Livoreka , i cili çdoherë shënon gola atraktivë. Lepenci nuk u ndal me kaq dhe shënoi edhe golin e tretë nëpërmjet Nexhat Avdiut në minutën 37. Mirëpo , kjo nuk ishte e tëra në pjesën e parë , pasiqë Skënder Gashi dhe Përparim Livoreka si duket nuk ishin të kënaqur vetëm me nga një gol. Ata shënuan edhe nga njëherë në pjesën e parë në minutat 31, përkatësisht 44 duke çuar rezultatin në 5:0 qysh në pjesën e parë.Kjo ishte goditje e rëndë për rahovecasit , të cilët nuk dinin kah t'ia mbanin në fushë , sikur të ishin nën ndikimin e rakisë së fortë të tyre , por shkaktar për këtë ishte "ofensiva" e Lepencit.

Në pjesën e dytë vendasit patën rast të zhvillonin një lojë paksa më të qetë si në stërvitje , pasiqë kishin kapital prej pesë golave.Pritej që mysafirët të shënonin së paku golin e nderit , por ata pësuan edhe një 10 minuta para përfundimit të ndeshjes nga zëvendësuesi Musli Zeneli , i cili shënoi nga afërsia duke kompletuar rezultatin, që shpesh e shohim nëpër fushat e tenisit 6:0.Tani Lepenci kryeson në plej aut me 42 pikë dhe luan më qetë në ndeshjet tjera të mbetura.

Stadiumi "Besnik Begunca" në Kaçanik. Shikues : 2500.Gjyqtarë: Mehmet Islami,Ardit Kastrati dhe Bedri Maliqi. Vëzhgues: Enver Qosja.Karton i verdhë:Vebi Alievski i Lepencit.

LEPENCI:Sh.Livoreka,R.Dema(M.Zeneli),M.Dema,Sh.Bela(F.Ismajli),A.Dema,V.Alievski,P.Livoreka,M.Rudi,S.Gashi,E.Musliovski,(F.Berisha),N.Avdiu. Trajner : Abit Dema/

RAHOVECI:N.Raba,F.Shabani,E.Haxhijaha(A.Raba),A.Delibeqa,E.Rama,M.Shehu(G.Hamza),D.Miftari,A.Cena,F.Shala,S.Sokoli,B.Haxhibeqiri. Trajner: Fehmi Haxhimustafa Materiali i marrur nga Kosova Sporti- Korrespodenti Shkëlqim AJDINI


--------------------------------------------------------------------------------


LEPENCI NË PRITJE TË TALENTËVE TË FUTBOLLIT

Klubi i Lepencit nga Kaçaniku nga një ekip me nam ,sot po përjeton çaste të vështira dhe mungesë të përkrahjes ,si morale ashtu edhe materiale.Dikur ky klub ishte krenaria e Kaçanikut, por kjo ka ngelur vetëm si pjesë e historisë.Sot, në mungesë të kushteve ,Lepencit i duhet të luftojë për mbijetesë në Ligën e Parë të Kosovës.Por,ajo që i bën të shpresojnë futbollistët kaçanikas janë gjeneratat e reja.Mbase, këto gjenerata i pret një e ardhme e ndritur. Në kuadër të KF Lepencit ekzistojnë edhe ekipet e juniorëve dhe atyre më të vegjëlve pionierëve.Për këta të fundit përkujdeset prof. Fatos Vishi,i cili ka të kryer Fakultetin e Kulturës Fizike në Prishtinë. Ai ka edhe një karrierë të bujshme futbollistike. Fillimisht ka luajtur në ekipin amë, pra në atë të Lepencit, pastaj me plot sukses mbrojti edhe ngjyrat e KF 2 Korrikut nga Prishtina, ku kaloi dy stinorë të tërë.Ne shkuam për të parë nga afër punën e tij me njomakët që premtojnë t'ia kthejnë famën klubit dhe qytetit të Kaçanikut në përgjithësi.Janë plot 30 pionierë që vijojnë stërvitjet dhe marrin direktivat nga trajneri i tyre, i cili me shumë vullnet dhe dashamirësi punon me ta. Sipas Vishit, që merret qe dy vjet me zbulimin e talentëve të rinj, pionierët kryesisht janë të moshave prej 9 deri 12 vjet dhe me ta zhvillon nga katër seanca stëvitore në javë.Ai na tha se të gjithë këta janë të mirë dhe premtojnë për një avancim të futbollit kaçanikas. Njëri nga talentët e këtij klubi është Gojart Axhami, i cili luan në rolin e mesfushorit. Ai është një futbollist i vërtetë dhe Lepenci ka çka pritë prej tij. Atij i pëlqen Tieri Anri dhe shpreson që një ditë të bëhet si ai. Klubi i pionierëve i Lepencit bën gara në rajonin e Ferizajit, ku pos këtij klubi marrin pjesë edhe klubet si Ferizaji, Ulpiana, Sharri(H.Elezit),Vjosa(Shtimje) dhe Kastrioti. Momentalisht njomakët e Lepencit janë të pozicionuar në vendin e tretë. Këta njomakë ishin pjesëmarrës në Turnirin "Dritarja e Shpresës", turnir ky që u mbajt në Strugë dhe që cilësohet si vendtakim i ekipeve nga Maqedonia, Shqipëria, Kosova etj. Atje, ata përfaqësuan denjësisht Kaçanikun dhe tërë Kosovën, duke u kualifikuar madje deri në finale. Ky është një sukses i madh që premton një të ardhme dhe një zhvillim të futbollit kaçanikas. Mbase, me vullnet dhe me elan duke punuar me gjeneratat e reja, mund të shpresojmë në përparimin dhe ndëkombëtarizimin e futbollit kosovar. Kështu do të arrijmë pjekurinë dhe kulturën e futbollit, të cilën do ta shfaqim një ditë në arenën ndëkombëtare. Materiali i marrur nga Kosova Sporti, korrespodenti nga Kaçaniku- Shkëlqim AJDINI


--------------------------------------------------------------------------------

Kaçanik : Lepenci-Ulpiana 2:1 (1:1)

Fitore minimale por shumë e rëndësishme Shënues : Përparim Livoreka '30, Nexhat Avdiu '67 për Lepencin, kurse Lorik Berbatovci '43 për Ulpianën

Analiza Edhe një fitore e rëndësishme e futbollistëve të Lepencit në përpjekje për të siguruar qëndrimin në Ligën e Parë të Kosovës.Këtë herë kaçanikasit ngadhnjyen ndaj Ulpianës dhe kjo ishte fitorja e katërt me radhë e Lepencit.Edhe në këtë ndeshje pati numër të konsiderueshëm të shikuesve , mbi 1000 sosh ,dhe ndoshta Lepenci ka një ndër shikueshmëritë më të mëdha në Kosovë.

Raporti Këtij takimi futbollistët e Lepencit i hynë me të vetmin synim , që të korrin edhe një fitore për t'u ndjerë më të qetë në takimet e radhës. Përmirësimi i lojës së Lepencit sa vjen e shtohet dhe kjo nuk mungoi edhe në këtë ndeshje. Përparim Livoreka i Lepencit dëshmoi se është një talent i rrallë duke treguar lojë briliante.Ai në përballje me Ulpianën shënoi një gol mjaftë të bukur , pasi paraprakisht pranoi një top nga Skënder Gashi. Mirëpo , mysafirët nuk u ndalën së kërkuari golin e barazimit dhe këtë e arritën dy minuta para përfundimit të pjesës së parë , kur Lorik Berbatovci nuk e pati të vështirë të shënoj nga afërsia , duke dërguar një top të lartë në drejtim të portierit vendas Shermet Livoreka , i cili ishte i shkurtë për ta penguar rrugëtimin e topit drejt rrjetës së tij. Në pjsën e dytë lojtarët mysafirë u munduan ta ruajnë rezultatin 1:1 dhe vetëm me kundërsulme tentonin të bënin diç. Megjithatë ishte e pamundur të përballoheshin sulmet e parreshtura të Lepencit.Në njërin prej këtyre sulmeve u arrit edhe goli i dytë , që në fund u tregua të jetë vendimtar. Nexhat Avdiu arrinë ta shpartalloj mbrojtjen e Ulpianës dhe ngritë në epërsi për herë të dytë skuadrën e tij. Pas këtij goli lojtarët e Lepencit patën edhe dy raste të qindpërqindta , por Skender Gashi , përkatësisht Përparim Livoreka nuk u treguan të saktë. Me këtë fitore Lepenci arrin në kuotën e 39 pikëve, ndërsa në takimin e radhës përballet me Rahovecin , ku pret edhe një fitore të re.

Stadiumi " Besnik Begunca" në Kaçanik.Shikues: 1000. Gjyqtarë :Qenan Haskuka,Ibrahim Ukshini dhe Sanije Krasniqi.Vëzhgues: Abaz Kosumi.

Kartona të verdhë: Nexhat Avdiu i Lepencit dhe Blerim Gerxhaliu i Ulpianës.

LEPENCI:Sh.Livoreka,R.Dema,M.Dema(M.Zeneli),Sh.Bela,A.Dema,V.Alievski,P.Livoreka,M.Rudi,S.Gashi(F.Berisha),E.Musliovski,N.Avdiu. Trajner: Abit Dema

ULPIANA: N.Begaj,E.Jashari,L.Ibrahimi(S.Salihu),A.Jashari,F.Reshiti,M.Leka,B.Sopa,A.Hyseni,A.Rexhepi(F.Etemi),L.Berbtovci(K.Kelmendi),B.Gerxhaliu.Trajner:Jeton Gashi Materiali eshte marre nga korespodenti i Kosova Sportit nga Kaçaniku- Shkelqim Ajdini